Një operacion policor i koduar “Otima”, për parandalimin e veprimtarisë kriminale në fushën e kultivimit të bimëve narkotike, ka vënë në pranga 3 persona.
Bëhet me dije se janë arrestuar Ferdinant Llanaj 43 vjeç person me precedent penal, Dritan Begaj 54 vjeç dhe Ergi Cura 21 vjeç.
Këta shtetas, në bashkëpunim me njëri-tjetrin, kishin kultivuar një numër të konsiderueshëm bimësh cannabis sativa në ambientet e banesës së shtetasit F. Ll. dhe në ambientet përreth një objekti po në pronësi të këtij shtetasi, në vendin e quajtur “Përroi i Otimës”, Selenicë.
Gjatë kontrolleve të ushtruara në këto ambiente, u gjetën dhe u sekuestruan në cilësinë e provës materiale një sasi lënde narkotike kanabis, 4 automjete, dy prej tyre të blinduara, 6 aparate celular dhe një shumë parash.
Materialet i kaluan Prokurorisë pranë Gjykatës së Shkallës së Parë Vlorë, për veprat penale “Prodhimi dhe shitja e lëndëve narkotike” dhe “Kultivim i bimëve narkotike”, kryer në bashkëpunim./Opinion.al
