Lajmi se Ogerta Manastirlliu do të jetë ministre e Shëndetësisë nuk ka surprizuar vetëm socialistët por edhe vetë zonjën në fjalë që me sa duket nuk e kishte menduar se i ka ardhur radha të drejtojë një dikaster kaq të rëndësishëm. Znj. Manastirlliu nuk ka asnjë kontribut në PS, ajo erdhi në detyrën e drejtoreshës së QSUT-së 3 vite e gjysëm më parë si një njohje e Ramës. Manastirlliu ka punuar më herët në Bashkinë e Tiranës së drejtuar prej Kryeministrit të sotëm.
Ajo ishte sot në një aktivitet të programuar ditë më parë (siç tha Rama) në fakultetin e Stomalogjisë. Aty ishte dhe Kryeministri i cili vetëm disa minuta më parë kishte deklaruar nga selia e PS-së, se Manastirlliu do të zëvendësojë Ilir Beqajn në postin e ministrit të Shëndetësisë. Teksa fliste për investimet e reja në prezencë të Ramës, Manastirlliut i mbahet goja dhe kërkon ujë. Moment ky që përcillet me duartrokitje nga të ftuarit si për ti thënë: Merr frymë, tani je Ministre!
