Duhet të kesh zemër të fortë të dëgjosh nënën e Florencit. Ajo humbi djalin e vetëm në Marsejë të Francës, ku kishte shkuar për të punuar. Trupi ende nuk është kthyer. Në shtëpinë e tij në Shkodër, familjarët kanë hapur dyert e mortit. Nëna mes lotësh e dhimbjes së madhe bën apel për drejtësi. “Ata (policia) e morën djalin gjallë dhe e çuan pa jetë në spital. Unë se di kush dhe pse ma vranë djalin”, shprehet ajo.
Nëna foli me të birin për herë të fundit më 8 Dhjetor në telefon. Kurse katër ditë më parë një polic francez u ka komunikuar atyre lajmin e vdekjes. Babai shkoi në Francë atje ku i biri ishte në vdekje klinike. Dje i kanë hequr oksigjenin, dhe Florenc Beqiraj nuk jeton më.
23 vjeçari ishte arrestua nga policia franceze 3 javë më parë pasi nuk kishte dokumentat e qëndrimit në këtë shtet. Sipas familjarëve ai ishte larguar nga Shkodra para dy viteve. Në Francë edhe ka punuar here pas here. Por për tri javë ai u mbajt në një burg të Marsejës dhe katër ditë më parë policia e dorëzoi në spital si të vdekur. Për këtë ngjarje ka patur reagime të shumta nga qytetarët që kanë kërkuar nga qeveria shqiptare të insistojë në zbardhjen e rrethanave të ngjarjes në burgun e Marsejës.
