Një video e ministrave Ahmetaj dhe Balluku, shoqëruar nga shefi i komunikimit në Kryeministri Endri Fuga dhe Nënkryetari i Bashkisë së Tiranës Arbi Mazniku, gjatë një darke në Dubai, është bërë tashmë virale në rrjet.
Darka është konsumuar në një nga lokalet më të njohura, “Nusreti”, duke shkaktuar në fakt jo pak reagime.
Por pikërisht përmes rrjeteve sociale, Kryeministri Rama u është përgjigjur komentuesve lidhur me këto imazhe, ndërsa ka pohuar se në vizitën e Dubait është aktualisht një grup i madh me përfaqësues të qeverisë, pushtetit vendor, mediave dhe me ftesë nga pala pritëse.
Rama është shprehur se kjo viztë ka për qëllim sjelljen e investimeve në Shqipëri, ndërsa ka theksuar që shpenzimet janë mbuluar prej mikpritësve.
“Mos u mbyt ne portalet e atyre qe vetem hedhin helm, po informohu dhe do ta mesosh qe ne Dubai ka shkuar nje grup i madh me perfaqesues te qeverise, pushtetit vendor, mediave, me ftese nga pala pritese dhe s’kane shkuar per karkaleca po per te sjelle investime ne Shqiperi, nderkohe qe tere shpenzimet mbulohen prej mikpritesve, keshtu qe kjo qe thua s’ka asnje lidhje, ndersa lokalin e vogel nuk besoj te ta mbylle qeveria, se qeveria nuk mbyll lokale dhe ty nuk te ka lene jetim, sepse kush ka lokal te vogel i jane hequr taksat e qeverise dhe i jane bere ZERO!”, shkruan Rama duke iu përgjigjur një prej komentuesve në faqen e tij.
Edhe kreu i PD Lulzim Basha e ka komentuar darkën e Dubait. Përmes një publikimi në Facebook, Basha shprehet se ministrat e Ramës shtrohen në restorantin më të shtrenjtë, në një kohë kur vendi është nën ujë.
“Ndërkohë që vendi është nën ujë, mijëra familje po kalojnë dimrin e dytë në çadra, shqiptarët janë pa asnjë ndihmë përballë krizës ekonomike dhe shëndetësore, ministrat e Ramës shtrohen për shtatë palë qejfe në restorantin më të shtrenjtë në Dubai. Ka ardhur koha për një qeveri që kujdeset për njerëzit, dhe jo këtë që e ka mendjen vetëm për veten e saj”, shkruan Basha.
Gjithashtu ish-kryeministri Berisha ka sjellë një sërë postimesh lidhur me darkën e shumpërfolur, ndërsa ka sjellë shembullin e futbollistit Ribery, i cili u gjobit nga klubi i tij, sepse postoi nje foto që po drekonte në Dubai me kofshë të mbështjellë me fletë floriri.
“Çmendet interneti! Memet e narkoministrave Ahmetaj, Balluku, Parukja etj tek El Nusreti ne darke si ne endrra me biftek te mbeshtjelle me flete floriri dhe verera ekzotike prej 13 mije eurosh po bejne xhiron e botes. Miq, Bayern i Mynihut gjobiti rende mesfushorin e tij Frank Ribery sepse postoi nje foto qe po drekonte ne Dubai te El Nusret me kofshe te mbeshtjelle me flete floriri. Por edhe diktatorin Maduro e sulmuan mbare mediat e botes se drekoi ne Stamboll tek El Nusret”, shkruan ndër të tjera Berisha.
Sikurse është bërë tashmë e ditur, një delegacion prej të paktën 18 personash nga qeveria shqiptare dhe Bashkia Tiranë kanë udhëtuar drejt Dubait për takime zyrtare, ndërkohë që në në fund të nëntorit, Kryeministri Rama firmosi një marrëveshje në Abu Dhabi për ndërtimin e 2000 shtëpive të reja, në Durrës dhe Spitallë nga fondet e Emirateve të Bashkuara Arabe./Opinion.al
