Një anije mallrash e mbushur me kimikate u fundos në brigjet perëndimore të Sri Lanka, duke shkaktuar frikën e një katastrofe mjedisore në Oqeanin Indian.
Anija MV X-Press Pearl e regjistruar në Singapor, mbante 1,486 kontejnerë, përfshirë 25 tonë acid nitrik dhe kimikate të tjera, u ankorua në brigjet perëndimore të Sri Lanka kur një zjarr shpërtheu në bord, raporton Reuters.
Kontejnerët të përfshirë në flakë të ngarkuar me kimikate ranë në det nga kuverta e anijes ndërsa ekipet e urgjencës u përpoqën të kontrollonin flakën përgjatë dy javëve.
Sri Lanka dhe marina indiane kanë punuar së bashku në një përpjekje për të shuar zjarrin dhe për të parandaluar fundosjen e anijes. Por zbaticat dhe erërat vështirësuan operacionin.
Ndërkohë qeveria të mërkurën pezulloi peshkimin përgjatë një shtrirje 80 km (50 milje) të vijës bregdetare të ishullit, duke prekur kështu 5,600 anije peshkimi.
Pamjet e realizuara në vendngjarje tregojnë tym dhe rrënoja të djegura të anijes, teksa ajo po fundoset.
Anija me kontejnerë, e ankoruar pranë portit Colombo, fillimisht raportoi një zjarr në bord për shkak të një rrjedhje kimike në një nga kontejnerët e saj.
Ndërkohë që fakti që Sri Lanka lejoi anijen të hyjë në ujërat e saj pasi u refuzua nga dy vende të tjera ka çuar në zemërim të gjerë publik.
“Anija ka dhënë një goditje vdekjeprurëse në jetën tonë,” tha Joshua Anthony, kreu sindikatës së peshkimit në rajon. “Ne nuk mund të hyjmë në det që do të thotë se nuk mund të sigurojmë jetesën”.
MV X-Press Pearl ishte larguar nga porti i Hazira në Indi në 15 maj dhe po vazhdonte rrugën për në Singapor përmes Colombo./Opinion.al
