Nëna e peshëngritësit Pirro Dhima është gjetur të enjten e vdekur në banesën e saj. Mësohet se e moshuara jetonte e vetme, ndërsa u gjet e pajetë nga fqinjët e saj.
Më herët, policia njoftoi se Lefteria Dhima, 75 vjeçe, dyshohet të ketë ndërruar jetë si pasojë e një arresti kardiak.
“Më datë 30.09.2021, në Himarë, është gjetur e vdekur pa shenja dhune, shtetasja L. Dh., 75 vjeçe, dyshohet vdekje natyrale, si pasojë e arrestit kardiak”, njoftoi policia.
Dyshimet kryesore janë që 75-vjeçarja të ketë humbur jetën 3-4 ditë më parë. E ndjera ishte nëna e Pirro Dhimës, i cili në vitin 1991 emigroi drejt Greqisë dhe u bë një nga sportistët më të njohur grek. Ai fitoi disa medalja të arta si peshëngritës në Lojërat Olimpike.
Pas lënies së peshëngritjes, Dhima u bë President i Federatës së Peshëngritjes në Greqi, më pas deputet i PASOK në parlamentin grek dhe së fundmi drejtor teknik i peshëngritësve në SHBA ku edhe jeton.
Ndërkohë pamjet e mëpshtme të marra nga tv klan tregojnë shtëpinë ku ka ndërruar jetë e moshuara./Opinion.al
