Një ndihmës infermier që nuk di të hapë barrelën. Pamjet që do të shikoni në videon e mëposhtme janë regjistruar ditët e fundit në Sheshin “Skënderbej” përballë Pallatit të Kulturës. Siç shikohet edhe nga pamjet, në ndihmë të një të moshuare kanë shkuar ambulanca e Urgjencës së Tiranës, e cila është detyruar të qëndrojë shumë metra larg personit që kishte nevojë për ndihmë, për shkak të pengesave që janë vendosur nga Bashkia në krah të Muzeumit. Por sikur të mos mjaftonte ky fakt, ndihmësinfermieri ka rezultuar plotësisht i paaftë për të hapur barrelën. Çka konstatohet lehtësisht edhe nga video. Për fat të mirë e moshuara është përmirësuar, por paaftësia që tregojnë në këtë rast bluzat e bardha mund të kushtojë shumë në një rast tjetër të ngjashëm.
