Futbollisti i famshëm i Kombëtares dhe i Dinamos së viteve ‘70-’80, Vasillaq Zëri, u nda nga jeta ditën e sotme në moshën 66 vjeçare.
Por loja dhe talenti i tij nuk do të shuhen kurrë te sportdashësit që e ndoqën në kohët e tij të arta.
Zëri krijoi bashkë me Ilir Përnaskën dhe Ballgjinin një nga treshet më të frikshme sulmuese të të gjitha epokave në futbollin shqiptar.
Nëse do ta quanim me zhargonin e sotëm, për kohën e Vasillaq Zëri ishte një “Messi shqiptar”.
Driblim dehës, teknikë e lartë dhe finalizim vdekjeprurës, ishin cilësitë që e bënin një sulmues vrasës.
Ndër ndeshjet që kanë lënë gjurmë në karrierën e tij brilante janë edhe ato me Etnikos të Pireut dhe Carl Zeis Jena për Kupën Uefa në vitin 1981-1982, ku edhe ishte shënues.
Fati i tij i keq ishte që e zhvilloi karrierën në një vend thellësisht të izoluar, ndërkohë që mund të kishte pasur një karrierë të ndritur edhe jashtë vendit.
