Punëtorët e rafinerisë së naftës në Ballsh vazhdojnë protestën përpara Ministrisë së Energjetikës. Ata janë shprehur mosbesues ndaj premtimit të ministrave Ahmetaj dhe Gjiknuri se nesër do të marrin pagat. Gjatë protestës që po zhvillohet aktualisht raportohet edhe përplasje me policinë.
Sakaq, ministria deklaroi më herët se gjatë këtij takimi, përfaqësuesit e sindikatës parashtruan kërkesat e mëposhtme:
1. Kryerja e pagesës për muajin Nëntor;
2. Sqarimin e problematikës në lidhje me përfitimin e statusit të naftëtarit;
3. Krijimin e infrastrukturës shëndetësore për trajtimin e sëmundjeve profesionale në Qarkun e Fierit;
4. Gjetjen e një zgjidhjeje të qëndrueshme dhe afatgjatë ekonomike për të ardhmen e rafinerisë.
Ministrat Gjiknuri dhe Ahmetaj theksuan edhe njëherë faktin se rafineria është tanimë një ndërmarrje në pronësi e përgjegjësi private, e për pasojë është detyrim ligjor dhe kontraktual i punëdhënësit privat të respektojë të gjitha detyrimet sipas legjislacionit në fuqi.
Institucionet shtetërore, duke marrë parasysh problematikën e parashtruar nga qytetarët e Bashkisë së Ballshit, por edhe shqetësimet e bëra publike nga Sindikata e Naftëtarëve, janë angazhuar me seriozitet të plotë dhe në mënyrë të vazhdueshme që nga njëra anë punëdhënësi privat të plotësojë të gjitha detyrimet kontraktuale ndaj punonjësve dhe nga ana tjetër të drejtat e punonjësve të garantohen sipas ligjit
