Kamerat televizive kapën trajnerin portugez të Manchester United të zemëruar me asistentët e tij gjatë takimit të “Europa League”, për shkak të mesfushorit francez. Manchester United fitoi dje 1-0 kundër Zorya, në ndeshjen e tij të dytë në “Europa League”, me një gol vetmitar, të shënuar nga Ibrahimovic. Por, historia e lojës ndodhi në stol, në “Old Trafford”, sigurisht me Jose Mourinhon si protagonist.
Gjatë ndeshjes, pas pushimit, ekipi ukrainas bëri ndryshime në taktikë dhe Paul Pogba vajti të konsultohet me stafin për pozicionin e tij në fushë, pasi nuk ishte i qartë se cilin lojtar duhet të mbulonte. Ndihmësi i Mourinhos, Rui Faria, ishte ai që kishte “playbook” në dorë dhe kishte marrë përgjegjësinë e sqarimit të dyshimit të Pogba në atë moment:
“Ne e paracaktojmë taktikisht se si do ta luajmë ndeshjen. Ukrainasit e kanë ndryshuar shpesh rreshtimin e ekipit gjatë ndeshjes. Paul Pogba ishte pak i hutuar me ndryshimet e tyre dhe padyshim duhej që ndihmësit e mi të kujdeseshin për të gjitha detajet në këtë aspekt,” – tha “Special One”.
Kamerat televizive e kanë kapur asistentin Faria duke dhënë udhëzime për Paul Pogba përpara Mourinhos. Trajneri kërkon ta përshpejtojë atë që asistenti po i shpjegonte francezit, në mënyrë që lojtari të kthehej në fushë. Pak më vonë, Mourinho shpërthen me stafin e vet teknik dhe bën si i çmendur me të, teksa ishte duke folur me Faria.
