Mediat e huaja kanë publikuar momentin kur u qëllua me breshëri armësh helikopteri me të cilin ishte duke fluturuar presidenti i Kolumbisë, Iván Duque.
Në pamje vërehet momenti kur helikopteri fluturon mbi një qytet në departamentin e Norte de Santander afër kufirit me Venezuelën të premten. Dhjetëra të shtëna u qëlluan në drejtim të tij, përpara se të aterronte në mënyrë të sigurt në Aeroportin Camilo Daza në Cúcuta.
Presidenti Ivan Duque, së bashku me ministrin e Mbrojtjes dhe atë të Brendshëm ishin duke udhëtuar drejt provincës së Santanderit kur ndodhi ngjarja.
Fatmirësisht nga ky incident nuk u lëndua askush, ndërkohë që një hetim ka nisur për ngjarjen.
Presidenti Duque e konsideroi sulmin një akt frikacakësh dhe shtoi se nuk do të trembet asnjëherë nga këto ngjarje terroriste.
