Ish-kryeministri Italian, Silvio Berlusconi, u nda sot nga jeta në moshën 86-vjeçare. Kreu i qeverisë shqiptare Edi Rama e cilësoi atë në një reagim në rrjetet sociale si mik të shqiptarëve.
Ndërkaq sot, është risjellë në vëmendje një video e publikuar vite më parë, ku Berlusconi shfaqet i përlotur për tragjedinë në Kanalin e Otrantos, që ndodhi më 28 mars 1997, njohur ndryshe edhe si përmbytja e Katerit të Radës.
Asokohe, Berlusconi ishte në opozitë dhe dha një deklaratë për mediat.
“Unë besoj se Italia nuk mund të pranojë t’i japë botës imazhin e dikujt që hedh në det dikë që po arratiset nga një vend fqinj, duke pasur frikë për jetën e tij, duke kërkuar shpëtim dhe arratisje në një vend ku ai e konsideron mik. Detyra jonë është t’i pranojmë ata që gjenden në këto kushte. Duhet ta lajmë këtë njollë që ka ardhur nga një vendim që nuk duhej marrë”, tha Berlusconi.
Anija shqiptare me 142 persona në bord, u përmbys nga forcat detare italiane në Ngushticën e Otrantos, duke shkaktuar humbjen e jetës së 57 personave, të moshave nga 3 deri në 69 vjeç.
