Pamje dëshpëruese vijnë edhe sot nga aeroporti i Kabulit, aty ku mijëra afganë përpiqen të largohen për një jetë më të mirë.
Në videot e transmetuara në mediat e huaja shfaqen gratë të cilat i hedhin foshnjat e tyre mbi tela me gjemba në aeroportin e Kabulit, teksa talebanët lëshuan granata dhe qëlluan gjatë natës për të larguar turmat e dëshpëruara.
Të paktën 12 persona kanë vdekur deri tani në aeroport që nga e diela, sipas talebanëve që kanë marrë përgjegjësinë për sigurinë, duke thënë se ata ose u qëlluan ose u shkelën ndërsa u bënin thirrje turmave të shpërndaheshin. “Ne nuk duam të lëndojmë askënd,” tha një zëdhënës sot.
Një oficer ushtrie rrëfeu se kishte parë nëna të dëshpëruara që po dhunoheshin nga talibanët.
“Ato bërtisnin ‘ma shpëto fëmijën!’ dhe i hidhnin foshnjat drejt ushtarëve britanikë. Disa foshnje ranë mbi telat me gjemba. Ajo çka ndodhi ishte një tmerr”.
Sipas oficerit, deri në fund të ditës nuk mbeti asnjë prej ushtarakëve pa qarë.
Ndërkohë sekretari britanik i mbrojtjes Ben Wallace këmbënguli se shtetasit perëndimorë po lejohen të kalojnë përmes unazës prej çeliku të talebanëve rreth aeroportit.
“Ne nuk kemi dërguar asnjë aeroplan bosh në shtëpi,” shtoi ai. “Ne do të përdorim çdo hapësirë në aeroplanët tanë.”
Wallace gjithashtu u bëri thirrje njerëzve që të mos i kalojnë foshnjat e tyre te trupat britanike brenda kompleksit të aeroportit, duke thënë se fëmijët e pashoqëruar nuk do të ngarkohen në fluturimet jashtë vendit./Opinion.al
