Rrëzimi i avionit ukrainas në Teheran ku humbën jetën 176 personat që ishin në bord ka shkaktuar një sërë polemikash dhe akuzash.
Shërbime të inteligjencës amerikane, irakiane, burime nga Pentagoni si dhe kryeministri i Kanadasë dyshojnë se avioni i nisur drejt Kievit u godit gabimisht nga dy raketa iraniane. Akuzat janë mohuar menjëherë nga Teherani zyrtar, i cili shprehet se këto supozime janë të pavërteta.
Në vorbullën e dyshimeve, një video e siguruar nga gjigandi mediatik CNN tregon një raketë që godet një objekt në ajër i cili supozohet të jetë avioni Boeing 737 i “Ukrainian Airlines”. Sipas të dhënave videoja është regjistruar në orët e para të mëngjesit të së mërkurës, që përkon me kohën kur ka ndodhur dhe rrëzimi i avionit.
Edhe pse CNN nuk e verifikon dot autenticitetin e videos, ndërtesat që shfaqen në të janë të ngjashme me ato që ndodhen në rrethinat e kryeqytetit iranian në Parand, pikërisht aty ku ra edhe avioni ukrainas./Opinion.al
