53-vjeçari Lutfi Çekirri humbi jetën duke kërkuar ndihmën e mjekëve, të cilët e dërguan herë në spitalin e Traumës e herë në urgjencë.
Një ditë para se të humbte jetën, ai së bashku me bashkëshorten e tij folën për mediat ku treguan se kishin kaluar ditën e natën pranë ambienteve të spitaleve, të dëshpëruar se dikush mund ti shihte dhe do ti jepte një përgjigje për gjendjen e rënduar shëndetësore, por askush nuk shkoi të ndihmonte 53-vjeçarin.
Lutfi Çekirri ka rrëfyer vetë se si e kaluan nga një spital tek tjetri, pa u shqetësuar aspak se sa po përkeqësohej gjendja e tij.
“Mbrëmë ishim në urgjencë dhe na kanë sjellë këtu për stomakun. Këtij i thotë shko tek infektivi, tjetri thotë s’je për këtu. Kemi qenë mbrëmë në Urgjencë, nga këtu shkuam në Laprakë. Atje më dhanë qetësues e më thanë duhet të shkosh të vizitohesh për stomakun. Tani nuk na japin përgjigje, një thotë shko atje. Jam me veshka, me ulçerë në stomak, tensionin e kam të ulët”,- tha Çekiri ndërsa gruaja shtoi se ka nevojë urgjente për shtrim.
Mësohet janë ngritur shpesh herë ankesa se në QSUT ka pacientë të ardhur nga qytete të ndryshme që nuk marrin trajtimet e nevojshme. Ndërkohë, pas vdekjes së 53-vjeçarit ministria e Shëndetësisë ka reaguar duke thënë se është ngritur një grup pune për të hetuar veprimet e mjekëve. Ky reagim vjen shumë vonë për 53-vjeçarin, vonesë e cila i kushtoi jetën, ndërsa deri më tani askush nuk mban përgjegjësi për vdekjen e një njeriu./ Opinion.al
