Një ngjarje e pazakontë ka marrë vëmendjen e mediave të huaja. Personat e pranishëm në funeralin e një gruaje të moshuar ekuadoriane u tronditën kur zbuluan se ajo ishte ende gjallë.
Një doktor në qytetin e Babahoyo e shpalli të vdekur 76-vjeçaren Bella Montoya, pas dyshimeve se pësoi goditje në tru.
Sipas BBC, gruaja u vendos në një arkivol dhe u dërgua në një sallon funerali, ku të afërmit mbajtën një vigjilje përpara varrimit të saj të planifikuar.
Kur pas gati pesë orësh hapën arkivolin për të ndërruar veshjet përpara funeralit, gruaja gulçoi për ajër.
“Mamaja ime filloi të lëvizte dorën e majtë, të hapte sytë, gojën; ajo luftoi për të marrë frymë,” përshkroi djali i saj Gilbert Balberán momentin kur kuptoi se nëna e tij ishte ende gjallë.
Në një video të xhiruar nga një prej të pranishmëve, gruaja shfaqet në arkivolin e hapur në vështirësi për të marrë frymë, ndërsa të tjerët ankohen për vonesën e ambulancës.
Disa minuta më vonë, mbërrin ambulanca dhe e ngrenë Bella Montoya-n në një barelë dhe e kthejnë në spital ku ajo ishte shpallur e vdekur.
#Ecuador: Una mujer de la tercera edad, de nombre Bella Montoya, fue dada por muerta en el hospital de Babahoyo.
Se la entregaron a su hijo al mediodía para que realizara el velorio, pero horas más tarde se dieron cuenta que aún estaba viva. pic.twitter.com/rpqPBnknfE
— Mauricio Orellana ✖️ (@MauriOrellanaSV) June 10, 2023
Djali i saj tha për mediat ekuadoriane se ajo ndodhej në kujdes intensiv, por po reagonte.
“Mamaja ime është me oksigjen, zemra e saj është në gjendje të qëndrueshme. Mjeku i shtrëngoi dorën dhe ajo reagoi, ata më thonë se është mirë sepse do të thotë se ajo po reagon pak nga pak,” e citoi atë të ketë thënë gazeta El Universo.
Balberán tha se kishte çuar nënën e tij në spital rreth orës 09:00 “dhe në mesditë një mjek më tha se ajo kishte vdekur”.
Ai tha se madje ishte lëshuar një certifikatë vdekjeje, ku thuhej se ajo kishte pësuar arrest kardiopulmonar pasi pësoi një goditje në tru.
Bella Montoya nuk është i vetmi person që “ringjallet” pasi u shpall zyrtarisht e vdekur.
Në shkurt, një grua 82-vjeçare u zbulua se po merrte frymë ndërsa ishte shtrirë në një shtëpi funerali në shtetin e Nju Jorkut. Ajo ishte shpallur e vdekur tre orë më parë në një shtëpi pleqsh./Opinion.al
