Cili është perimetri i sigurisë dhe kush e ruan atë?
Sipas shefit të Komisariatit të Rinasit, përgjegjësia e ruajtjes së aeroportit të Rinasit, referuar kontratës së TIA-s, ndahet në këtë mënyrë.
Si ne çdo aeroport tjetër civil në Evropë e më gjerë, koncesionari që ka nën menaxhim shërbimet në aeroport, TIA, ka detyrimin e ofrimit të sigurisë së sherbimeve në të, për avionët, pasagjerët dhe bagazhet.
TIA, ka ndërtuar sistemin e sigurisë duke e ndarë në dy segmente, sigurinë e ambjenteve të brendshme, skanerave dhe sigurinë e jashtme të aeroportit.
TIA ka përzgjedhur për sigurinë e brendshme të aeroportit kompaninë ICTS. Ndërkohë po TIA ka përzgjedhur për sigurinë e jashtme të aeroportit kompaninë Nazeri shpk.
Është pikërisht kjo kompani që ka përgjegjësinë e ruajtjes së sigurisë në portën nga kanë hyrë grabitësit me makinën e tyre.
Në mënyrë të pabesueshme edhe sigurinë e mjeteve monetare si dhe transportin në këtë rast, e kryente e njëjta kompani, Nazeri shpk.
Pra si rojet e portës së aeroportit dhe rojet e makinës së blinduar që ndodhej në pistë pranë avionit, e mbushur me para, ishin punonjës të kompanisë Nazeri shpk.
Ndërkohë, të gjithë aeroportet që menaxhohen kështu në mënyrë civile dhe për sigurinë, auditohen nga një autoritet shtetëror, Autoriteti i Aviacionit Civil.
Ky autoritet duhet të auditojë aeroportin të paktën dy herë në vit.
Policia e Shtetit është e angazhuar në aeroportin e Rinasit me shërbimin e kufirit dhe emigracionit.
Për shkak të statusit të aeroportit dhe nën regjimin e koncesionarit, Policia e Shtetit e ka të ndaluar të shërbejë për ruajtjen e objektit.
