Ilir Meta është rizgjedhur në krye të Levizjes Socialiste për Integrim nga anëtarësia e kësaj partie, pas zgjedhjeve të brendshme që u zhvilluan një ditë më parë.
Me anë të një videomesazhi, Meta ka falenderuar përzemërisht të gjithë anëtarët e LSI-së që morën pjesë masivisht në votime.
Ai thekson se pjesëmarrja e tyre ka qenë një manifestim i mrekullueshëm i besimit dhe i lidhjes tek LSI-ja, gjithashtu një falenderim i veçantë shkon për gjithë komisionerët dhe vëzhguesit që garantuan një proces shembullor të votimit.
Kreu i LSI-së, Ilir Meta ka falenderuar përzemërsisht dy kolegët z.Rrokaj dhe z.Spahiu për pjesëmarrjen në garë, si dhe për mendimet dhe idetë e tyre të vyera.
Sipas tij, ata dhanë një kontribut të veçantë për t’a bërë gjithë këtë proces edhe më demokratik, por njëkohësisht edhe për të rritur pjesëmarrjen dhe përfshirjen në këtë garë.
“Dua të falenderoj të gjithë për mendimet, për kritikat, për vërejtjet e tyre dhe jam i bindur se tani nisemi drejt Konventës Zgjedhore të LSI-së në datat 3-4 dhjetor me më shumë ide dhe me më shumë vullnet për t’i sinkronizuar ato dhe për të garantuar një LSI sipas vullnetit të anëtarësisë që u shpreh dje dhe njëkohësisht që kërkon më shumë nga vetja e saj, në një mënyrë që të japë më shumë për Shqipërinë”, tha Meta.
Ai mori 76% të votave, duke lënë pas Përparim Spahiun me 21.1% të votave dhe në vendin e tretë, Shezai Rrokajn me 11.9% të votave. Lajmi u dha zyrtarisht gjatë mesditës së sotme nga LSI.
Shiko videon:
