Policia e Shtetit po vijon kontrollet intensive duke përdorur makinën inteligjente, radarë, dronë, mjete të pauniformuara, kamera, aparate fotografike dhe alkooltestues, për parandalimin e aksidenteve rrugore.
Makina inteligjente dhe radarët monitorojnë qarkullimin rrugor në të gjithë territorin e vendit, duke evidentuar dhe ndëshkuar drejtues mjetesh që qarkullojnë me shpejtësi mbi normat e lejuara, pa vendosur rripin e sigurimit apo duke përdorur celularin gjatë drejtimit të mjetit.
Autoritetet bëjnë me dije se gjatë kësaj jave, nga makina inteligjente dhe radarët janë evidentuar duke qarkulluar me shpejtësi deri në dyfishin e normës së lejuar, 1779 drejtues mjetesh. Për 102 prej tyre është marrë masa e pezullimit të lejes së drejtimit nga 1 muaj deri në 16 muaj.
Gjithashtu, në të gjithë vendin, gjatë kontrolleve permanente janë evidentuar dhe ndëshkuar 3987 drejtues mjetesh, për shkelje të ndryshme që janë rrezik potencial për përfshirje në ngjarje rrugore.
Policia njofton se janë pezulluar 40 leje drejtimi për drejtim mjeti nën efektin e alkoolit dhe 14 për qarkullim në sens të kundërt si dhe janë arrestuar 40 drejtues mjetesh, nga të cilët 19 për drejtim mjeti në gjendje të dehur dhe 21 për drejtim mjeti pa leje drejtimi.
