Ish-kryeministri Sali Berisha ka reaguar pasi Gjykata e Krimeve të Rënda pranoi gjykim i shkurtuar për Kelmend Balilin dhe kështu “Eskobari i Ballkanit” përfiton uljen e 1/3 së dënimit. Në një status në rrjetet sociale, Berisha tregon arsyet pse u lejua ky favorizim, sipas tij.
“Thesaret e Balilit, domethënë videot me orgji të regjistruara në Santa Quaranta të vet Ediskobarit dhe narkoqeritarëve të tij. Sjellja e mirë dy vite në arrati e Eskobarit çka detyroi Ediskobarin t’i njohë 1 vit arrati për tre vite burg dhe t’i rezervoje gjykimin e shkurtuar. Kjo e fundit u thotë të gjithë krimineleve qëndroni në arrati po deshët që të keni lehtësi, natyrisht po patet video me orgji”, shkruan Berisha.
Seanca e sotme për Balilin, nisi me Prokurorin Ened Nakuçi që lexoi kërkesën për gjykim, i cili argumentoi ngritjen e 4 akuzave. Sipas akuzës është provuar nga hetimet që Balili ka kryer trafik droge, fshehje dhe pastrim parash si pjesë e një grupi të strukturuar kriminal. Konkretisht ai akuzohet për trafikun me gomone të 678 kilogramëve kanabis nga Saranda në Greqi.
Ky proces gjyqësor pritet të jetë një nga më të shkurtrit të zhvilluar ndonjëherë në Shqipëri. Gjithçka ka ndodhur në 40 ditë. Në 15 Janar, Kelmend Balili u vetëdorëzua pas negociatave të kryera me Policinë e Shtetit. Në 17 Janar, ai doli për herë të parë në gjykatë për t’u njohur me masën e sigurisë dhe akuzat, duke i mohuar ato.
Vetëdorëzimi i tij përkoi edhe me dërgimin në gjykatë të dosjes nga ana e prokurorisë. Në 25 Janar u zhvillua seanca paraprake ku Kelmend Balili kërkoi gjykimin e shkurtuar dhe gjykatësja e seancës paraprake e kaloi dosjen për gjykim, duke e konsideruar të mbyllur hetimin e prokurorisë.
Këtë të hënë, treshja e gjyqtarëve të themelit vendosi të pranojë gjykimin e shkurtuar duke i lënë kohë prokurorisë dy javë me qëllim përgatitjen e pretencës. Nëse procesi nuk do ketë vonesa të tjera, vendimi për Kelmend Balilin pritet të merret brenda muajit Mars, nga Gjykata e Krimeve të Rënda. /G.F Opinion.al
