Policia e Fierit ka nisur hetimet pas publikimit të një video në rrjetet sociale, ku shihej një luan duke kafshuar një burrë në kokë.
Sipas uniformave blu mësohet se ngjarja ka ndodhur në fshatin Zharrëz, ku 52-vjeçari me inicialet A.H., mbante në shtëpinë e tij kafshën e egër.
Për 52-vjeçarin nisi procedimi në gjendje të lirë pasi akuzohet se ka mbajtur kafshën, në banesë, në kundërshtim me rregullat.
Sipas tvklan, 52-vjeçari ka deklaruar se kafshën e ka gjetur në Lushnje në rrugë 6 muaj më parë kur ishte e vogël. Ai ka treguar se e ka mbajtur në banesën e tij për disa kohë derisa para 1 muaji e gjysmë kafsha ka ngordhur.
“Në lidhje me një video të publikuar në rrjetet sociale, në të cilën shfaqet një kafshë e egër (luan) që kafshon një shtetas, specialistët për Hetimin e Krimeve të Komisariatit të Policisë Fier kanë kryer veprimet e nevojshme hetimore dhe procedurale për përcaktimin e përgjegjësisë dhe zbardhjen e rrethanave.
Në përfundim të këtyre veprimeve u identifikua shtetasi që kishte në pronësi kafshën, A. H., 52 vjeç, banues në fshatin Zharrëz, për të cilin, pas konsultimit me prokurorin, nisi procedimi në gjendje të lirë për veprën penale “Shkelja e karantinës së bimëve dhe kafshëve”, pasi dyshohet se e ka mbajtur kafshën, në banesë, në kundërshtim me rregullat”, sqaron policia.
