Nesër në mbrëmje, në Las Vegas do të zhvillohet përballja e Arteve Marciale Mikse (MMA) midis irlandezit Conor McGregor dhe amerikanit Nate Diaz, një sfidë që në fakt ka nisur që sot. Gjatë prezantimit për mediat që është bërë në Las Vegas, 48 orë para sfidës, McGregor dhe Dias kanë nisur një sherr.
Është dashur ndërhyrja e presidentit të UFC-së, Dana White, stafeve të sportistëve dhe e truprojave që të ndalnin këtë sherr që u zhvillua në skenë. “Unë jam një luan, do të të ha të gjallë”, ka qenë komenti i Conor McGregor drejtuar rivalit të tij gjatë incidentit që ndodhi “live”.
Një sherr që premton për një duel elektrizues nesër në mbrëmje në UFC-196. Gjatë kohës që Diaz zgjaste duart drejt fytyrës së McGregor në formë grushtimi, irlandezi ka replikuar, duke gjuajtur dhe këtu ka nisur sherri, që përfundoi me sharje reciproke nga të dy sportistët, ndërkohë që qindra fansa ndodheshin.
Kjo ishte përballja e dytë “face to face” e dy sprotistëve, që për herë të parë në karrierë do të duelojnë me njëri-tjetrin (Diaz zuri vendin e Dos Anjos, i dëmtuar). “Më pëlqen Las Vegasi. Këtu kam “djegur” tri rivalë dhe të shtunën në mbrëmje do të “djeg” edhe të
katërtin. Diaz është një kaproll që do ta ha të gjallë”, shtoi më tej McGregor, teksa i drejtohej daljes së skenës i mbajtur nga truprojat.
McGregor, kampion i botës në peshën 66kg, kaloi në një kategori më të lartë peshe për t’u përballur me kampionin e peshës 75kg, Rafael Dos Anjos, duke kërkuar një tjetër titull kampion.
Por braziliani u tërhoq dhe vendin e tij e zuri Nate Diaz, 2 javë para duelit të 5 marsit në Las Vegas. Të dy sportistët kanë pretenduar fitoren, në një duel që parashikohet shumë i bukur. Po më 5 mars do të zhvillohet edhe përballja e femrave midis kampiones në fuqi Holly Holm dhe sfidantes Miesha Tate. Edhe këto të dyja janë prezantuar mbrëmë para mediave, por për fat në këtë takim “ballë për ballë” nuk pati asnjë incident.
