Autoritetet tuniziane kanë mbyllur një lokal nate dhe kanë filluar hetimet pasi një DJ-i i ftuar luajti një remiks të lutjes myslimane e njohur si Ezani.
Një video e shpërndarë nga festivali Orbit i muzikës tekno në Tunizi, ka shkaktuar zemërim në mediat sociale dhe tek qytetarët e këtij vendi, duke e cilësuar këtë veprim si akt kriminal.
Guvernatori i qytetit Nabeul të Tunizisë, Mnaouer Ouertani, ka deklaruar për AFP se ky klub i natës do të vazhdojë të qëndrojë i mbyllur derisa të merret një vendim përfundimtar, kurse menaxheri i saj është arrestuar.
“Pasi është konfirmuar rasti, kemi vendosur ta mbyllim klubin e natës deri në një vendim përfundimtar. Në asnjë mënyrë nuk do të lejojmë që feja, ndjenja dhe vendet e shenjta të sulmohen në këtë mënyrë”, ka deklaruar Ouertani.
Nga ana tjetër edhe Dj-i britanik, Dax J, ka kërkuar falje.
“Dua ti kërkoj falje kujtdo që mund të jetë ofenduar nga muzika që luajta në festivalin Orbit në Tunizi, të premten e kaluar. Nuk kisha për qëllim të mërzisja e as ofendoja dikë.”
