“Me t’u ulur në tryezën e qeverisë, ligji i parë nga kapica e mbeturinave të ligjeve të qeverisë Berisha do të jetë ky ligj, që është antikombëtar, antidemokratik dhe antinjerëzor. Do të përdorim çdo mjet, përfshirë edhe referendumin popullor”, ishte kjo deklarata që Rama bëri më 25 Tetor të 2011 -ës.
Dhe me të vertetë, vendimi i parë që Edi Rama mori në zyrën e tij si Kryeministër më 22 Shtator të vitit 2013, ishte ai për ndalimin e importit të mbetjeve.
Më 11 Tetor e votoi në parlament.
Por tre vjet më vonë është po mazhoranca e drejtuar prej tij, që vendos për amendimin e këtij ligji, për të mundësuar lejimin e importit të plehrave.
Ndryshe nga sa thotë kreu i Komisionit të Veprimtarive Prodhuese, që importin e mbetjeve e ka kundështuar me dhjetëra herë kur ishte në opozitë, menaxhimi i mbetjeve mbetet ende problematik.
Shihni këto pamje që vijnë sot nga Kuçova. Plehrat e Kuçovës dhe të Urës Vajgurore hidhen shumë pranë lumit Devoll. Me nisjen e rreshjeve, banorët thonë se ato përfundojnë në lumë.
Kur opozita socialiste e kundërshtonte importin e mbetjeve, qeveria Berisha dhe industritë e riciklimit e mbronin ligjin duke thënë se ai ishte sipas direktivave të Bashkimit Europian. Sot në pushtet, e majta ndoshta ka të drejtë që i lejon mbetjet e riciklueshme. Por vendimi i tyre tregon se kundështimi që i bëhej tre vjet më parë ishte thjesht demagogji dhe një lojë politike kundër qeverisë së zotit Berisha.
Tv Klan
