Manchester United vazhdon ecurinë e fitoreve duke mposhtur Arsenal 3-1 në, atë që njerëzit po quajnë, ndeshjen më e bukur e sezonit aktual të Premier League. Ishte një sfidë që i kishte të gjitha, gola, pritje spektakolare dhe karton të kuq. Por në fund Djajtë e Kuq kanë marrë tri pikë tepër të rëndësishme ndaj një rivali të përhershëm si Arsenal-i i Arsene Wenger.
Ishte United ekipi që e nisi mirë lojën ndaj vendasve të përgjumur duke shënuar dy gola në 11 minutat e para me Valencia dhe Lingard. Arsenal hidhet në sulm menjëherë dhe loja bëhet spektakolare pasi në njërin krah kishim sulmet me shumë lojtarë të vendasve dhe në tjetrin kundërsulmet e rrufeshme të miqve.
Arsenal e meritonte një gol në pjesën e parë pas rasteve të pafundme të krijuara por De Gea ishte në një ditë të mirë, si përherë. Por pas pushimit erdhi goli që rihapi gjithçka falë Lacazette. Arsenal shton aksionet sulmuese duke lejuar hapësira të mëdha në prapavijë që shfrytëzohen nga Pogba që ia shtron topin Lingard për golin e tretë.
Kur dukej sikur ndeshja kishte përfunduar, Pogba del me karton të kuq pas një faulli të shëmtuar ndaj Bellerin. Minutat e fundit janë emocionuese, teksa Arsenal sulmon me tetë lojtarë dhe United mbrohet me dhjetë. Vizitorët arritën të mbronin rezultatin dhe i ushtrojnë presion City-t me këtë fitore sensacionale.
https://www.dailymotion.com/video/x6ayffq#tab_embed
