Rruga Levan-Tepelenë ka prodhuar një tjetër aksident këtë pasdite. Burrë e grua të cilët ktheheshin nga Greqia, kanë dalë me makinën e tyre tip “Skoda” jashtë rruge duke përfunduar në arë.
Siç shikohet edhe nga pamjet filmike, makina është aksidentuar në vendin e quajtur Selishtë pranë Mallakastrës.
Drejtuesi i mjetit, 31-vjeçari M. Muçaj është plagosur rëndë, ndërsa bashkëshortja e tij mësohet se ka pësuar lëndime më të lehta.
Mësohet po kështu se makina tip “Skoda”, vinte nga Greqia me destinacion Tiranën, aty ku banon edhe çifti i bashkëshortëve.
Nuk dihen ende shkaqet e këtij aksidenti, por dyshohet se drejtuesi i mjetit ka humbur kontrollin e automjetit si shkak i lodhjes dhe përgjumjes që mund të ketë ndikuar në aksident.
