Banorët e Unazës së Re kanë zhvendosur sot protestën e tyre në qendër të Tiranës, përpara Bashkisë. Ata kërkojnë takim me kryetarin e Bashkisë, Erion Veliaj, pasi nga projekti për zgjerimin e rrugës mbeten pa shtëpi.
Për shkak të protestës është bllokuar edhe rruga, ndërsa me dhjetëra mjete kanë mbetur të bllokuara në trafik.
Protestuesit mbajnë në duar pankarta me mesazhe si “shtëpitë do i mbrojmë me trupat tanë”, “dy duar për një kokë”, “duam pronat tona”, “kryeministër ku je fshehur?”, “lali Eri ku je fshehur?”, ndërsa në një banderolë të madhe kanë shkruar “fuqia e njerëzve më e madhe se njerëzit në fuqi”.
Banorët kundërshtojnë prishjen e banesave pa u legalizuar më parë, në mënyrë që të kenë të drejtën e dëmshpërblimit. Ata kërkojnë takim me Veliaj për gjetjen e një zgjidhje.
