Bujar Nishani është në fund të mandatit të parë si president i Republikës së Shqipërisë dhe Kuvendit i duhet të zgjedhë pasardhësin e tij.
Presidenti i Republikës nuk vazhdon pas datës 24 korrik, më pas kompetencat e presidentit i merr kryetari i Kuvendit.
Gjithsesi, më shumë se përmendja e datës 24 korrik dhe simbolikës që kjo datë ka në memorien shtetërore, ia vlen që sot të shohim përtej ditës dhe të mendojmë se çfarë do të ndodhë më 24 korrik 2017 kur përfundon mandati i presidentit aktual dhe kur presidenti i ri do ta ketë të pamundur të marrë detyrën (nëse nuk ndryshohet kushtetuta në minutën e fundit !!!). Pse? Sepse në vitin 2017 mandati presidencial mbaron dy muaj përpara mbarimit të mandatit të Kuvendit ekzistues, ndaj për pasojë, procedura për zgjedhjen e Presidentit fillon më përpara sesa data 9 korrik 2017, 60 ditë nga mbarimi i mandatit të Kuvendit.
Zgjedhjet e rregullta parlamentare pritet të mbahen në fundin e muajit qershor 2017, pas periudhës 45 ditore të shpërndarjes së parlamentit. Në këtë mënyrë, parlamenti do të duhet të shpërndahet në fillim të muajit maj 2017. Përpara se të shpërndahet, parlamenti do të duhet të zgjedhë Presidentin e Republikes.
