Teksa kanë kaluar tre ditë pas operacionit në Malësi të Madhe ku u zbuluan 26.600 fidanë kanabisi, policia ka arrestuar një nga autorët e dyshuar. Bëhet fjalë për 55-vjeçarin Ajet Delishaj.
Uniformat blu njoftojnë se 55-vjeçari dyshohet se është autori i kultivimit të 26.600 fidanëve me kanabis që u gjetën nga shërbimet e Komisariatit të Policisë Malësi e Madhe, gjatë kontrollit të territorit të fshatrave Gruemirë dhe Çesme.
55-vjeçari ishte shpallur në kërkim gjatë fazës së dytë të operacionit policor antikanabis të koduar “Alpe të pastra”, në zbatim të planit operacional për kontrollin e territorit.
Në bashkëpunim me Prokurorinë, policia vijon hetimet për identifikimin dhe kapjen e shtetasve të tjerë të implikuar në këtë veprimtari kriminale.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
