Aktualitet

Video/Koncert tek Liqeni kundër çdo protokolli, kush po i thyen rregullat?


Bëhu pjesë e Grupit Zyrtar të Opinion.al
>> KËTU <<
               Publikuar në : 22:39 - 19/06/20 |
Opi Nion

Në një kohë kur shifrat e personave të prekur nga COVID -19 shënojnë rritje dhe kur autoritetet bëjnë thirrje për distancim fizik apo portokolle rigoroze në ambjente publike, një tjetër anë e medaljes shfaqet këtë të premte në Amfiteatrin e Liqenit Artificial. Një koncert i gjimnazeve të Tiranës për evidentimin e talenteve të reja. Sikurse shihet nga imazhet e siguruara nga Opinion.al, edhe pse koncerti po zhvillohet “pa spektatorë”, një numër i madh qytetarësh të tërhequr nga muzika e lartë, vërehen të grumbulluar masivisht jashtë kangjellave të rrethimit, shumë pranë njëri-tjetrit, pa asnjë masë mbrojtëse.

 

 

Nga ana tjetër, nxënësit që janë protagonistë të shfaqjes, jo vetëm që performojnë në vallëzime e numra artistikë pa asnjë distancë, por shihen në grupime të mëdha, krejtësisht të shkujdesur.

Në një kohë kur aktivitetet kulturore dhe artistike nuk janë të lejuara, në një kohë kur institucionet e rëndësishme të kulturës si Teatri i Operas dhe Baletit vijon t’i japin online shfaqjet e tyre, pyetja më e thjeshtë që të vjen në mendje është: A ishte i domosdoshëm ky koncert gjimnazistësh një pasdite të premteje, sa ta lejohej organizimi i tij përtej çdo rregulli? Ku janë protokollet e trumbetuara nga Ministria e Shëndetësisë dhe cilët janë ata që  duhej të kontrollonin ndalimin e këtij koncerti, apo të paktën të merrnin masat për këtë aktivitet? Ku ishte sot Inspektoriati Shëndetësor që mbyll aktivitete apo policia që shoqëron qytetarë?

Le të mos harrojmë se vetëm dy ditë më parë 11 persona janë proceduar nga Policia e Tiranës pas dy tubimeve të mbajtura më 17 Qershor, përkatësisht përpara Ministrisë së Infrastrukturës dhe asaj të Arsimit, pikërisht sepse tubimet në ditë si këto konsiderohen të paligjshme. A do të procedojë policia në të njëjtën mënyrë edhe organizatorët e koncerti?

Le të mos harrojmë, se vetëm 3 ditë më parë Kryeministri Rama foli për moslejim të asnjë lloj grumbullimi.  “Kush merr pjesë në grupime më të mëdha se sa numrat e lejuar nga protokollet e sigurisë do të penalizohet drejtpërdrejtë, individualisht”, tha në mënyrë të qartë Kryeministri në daljen e tij të datës 16 Qershor.

Por me sa duket fjalët e zotit Rama nuk janë dëgjuar nga të gjithë, apo ndoshta pesha e vendimeve të tij nuk rëndon njëlloj për të gjithë.

Ndërsa përdoren pa nevojë këto standarde të dyfishta, kjo shfaqje e bukur të rinjsh një mbrëmje të premtjeje, fatkeqësisht duket si një lojë e shëmtuar me përgjegjshmërinë e atyre që gjatë gjithë kësaj periudhe të vështirë, priren të zbatojnë çdo rregull, masë e detyrim, për të mbrojtur veten dhe të dashurit!/Opinion.al

Pas