Një sasi prej 1 191 kg lëndë narkotike Cannabis Sativa është sekuestruar nga policia në Fier, e cila po transportohej nëpërmjet detit.
Policia e Shtetit bëri me dije se lënda narkotike ishte e ndarë në 151 pako të mëdha dhe po transportohej me një mjet lundrues velierë me emrin “Nano Nini” me flamur belg.
Me të parë Rojën Bregdetare, dy personat në bordin e mjetit lundrues një shqiptar dhe një italian, kanë hedhur lëndën narkotike në det në zonën midis plazhit të Semanit dhe të Darëzezës. Ata janë shtetasit Veli Ymeraj, 35 vjeç, banues në Fier dhe Ciovanni Palladino, 69 vjeç, banues në Itali, të cilët janë arrestuar nga policia.
Në operacionin e vështirë për shkak të kushteve atmosferike me dallgë 5 – 6 ballë janë angazhuar edhe Policia Kufitare dhe Delta Forcë si dhe Guardia di Finanza.
“Personat në velierë janë kapur nga Policia dhe janë shoqëruar në Drejtorinë Vendore të Policisë, Fier. Forcat e Policisë të Drejtorisë Vendore të Policisë Fier, së bashku me FNSH-në Fier, Delta Forcë e Policisë Kufitare përgjatë natës dhe orëve të para të ditës së sotme, kanë rikuperuar të gjithë sasinë e lëndës narkotike që ishte hedhur në det. Gjatë kontrollit në mjetin lundrues janë gjetur mbetje të lëndës narkotike dy armë gjahu pa leje, dy aparate GPS dhe 1 palë dylbi”, sqaron policia.
Policia thotë se dyshohet se mjeti lundrues kishte destinacion Italinë.
Vijojnë hetimet në bashkëpunim me Prokurorinë e Krimeve të Rënda dhe me Policinë Italiane për zbardhjen e plotë të tentativës për trafik ndërkombëtar të lëndëve narkotike
