Siç ishte paralajmëruar gjimnazi “Petro Nini Luarasi” është përshtatur ditën e sotme si një ambient universitar ku do të zhvillojë leksionet Fakulteti Juridik, për ata studentë që dëshironin të vazhdonin mësimin.
Hapja e gjimnazit për të pritur studentët, është ballafaquar me incidente që në krye të herës.
Studentët bojkotues kanë mbyllur derën kryesore të shkollës me zinxhir, duke bërë që drejtuesit e dekanatit të gjejnë një hyrje alternative për të hyrë në shkollë.
Ky incident ka sjellë në hyrjen kryesore të gjimnazit edhe një prani të shtuar të forcave “Shqiponja” të Policisë.
Siç shikohet edhe në pamjet e siguruara nga Faxneës, partrulla Shqiponja vazhdon të jetë në ambientet e jashtme të shkollës.
Vetë studentët ndihen të paqartë se si do të vazhdojë mësimi, ndërsa dekanati i Juridikut është shprehur se në dispozicion çdo pasdite do të vihen 38 klasa për vitet e para, të dyta dhe të treta në sistemin bachelor.
