Pronari i rrjetit të picerive “Era” në Tiranë Altin Bamllari ka patur një konflikt verbal me punonjës të Policisë Rrugore në Tiranë. Ngjarja u bë publike prej biznesmenit në Facebook të dielën paradite, ndërsa incidenti ka ndodhur mesnatën e së shtunës. Ai ka pretenduar edhe dhunë fizike, duke thënë se policët e kanë goditur atë dhe të birin, por policia e mohon.
Gjithçka ka nisur për një gjobë të papaguar. Djali 22 vjeçar i Bamllarit është ndaluar nga policia në Bulevard përballë Piramidës dhe i është kërkuar të çojë makinën në pikë bllokimi sepse kishte gjoba në vlerën e 150 mijë lekëve. Drejtuesi i mjetit nuk ka lëvizur nga makina, nuk i është bindur urdhërit të policit Rrugor dhe ka pritur mbi 20 minuta në makinë derisa ka mbërritur i ati.
Dy video, njëra e siguruar nga Opinion.al dhe tjetra nga Newsbomb.al tregojnë fare mirë sherrin që ka bërë pronari në fjalë me policët. Dhe siç ndodh rëndom në Shqipëri, Bamllari ka permendur gjithë emrat e drejtuesve që nga Ministri i Brendshëm e me radhë në përpjekje për të “shpëtuar” nga polici. Më pas ai ia fut vrapit bashkë me të birin dhe polici i ndjek nga pas… Shihni video 1
Biznesmeni dëgjohet në video teksa thotë: “Nuk ka bërë asgjë djali. Lërë more djalin. Nuk do të vijë se nuk ka bërë asgjë. Ca do ta fusni tani në orën 01:00 aty që nuk kemi ku të marrim njëri në telefon. Unë jam miku i Toles (Mithat Tola, Drejtor i Përgjithshëm i Policisë Rrugore), juve t’u vije turp. I Saimirit (ministrit të Brendshëm, Saimir Tahiri), i Engjëllushit, e i dreqit e i shejtanit jam”. Shihni video 2
