Televizioni Klan ka ndjekur nga afër vazhdimin e aksionit “Patriot” për gjetjen e personave të tjerë të përfshirë në grabitjen e bankave si dhe gjetjen e parave të grabitura.
Aktualisht në kërkim, si koka e bandës është Admir Murataj nga Tropoja por me banim në Fushë-Prezë. Në pamjet që sjell tv Klan shihet qartë se Murataj jetonte shumë mirë në një vilë të mirëinvestuar, madhe dhe me kamera sigurie. Banorët thonë që e njihnin fare pak. Ai e ka blerë tokën para 10 vitesh por investimi i shtëpisë ka përfunduar vitet e fundit. “Vinte dhe ikte”, thotë një banore e zonës, ndërsa shton se aty jetonin familjarët e tij.
Në këtë banesë, policia ka sekuestruar një pjesë të parave, të dyshuara të grabitura. Shuma më e madhe u gjet në një servis të familjes Murataj në Vorë.
Baza e grupit dyshohet se ishte një apartament në qendër të Vorës. Banesat ku jetonin anëtaret e grupit dhe vendet ku janë sekuestruar paratë vijojnë të jenë nën mbikëqyrjen e policisë për 24 orë. Një pjese e parave, sipas grupit hetimor, janë investuar në forma të ndryshme nga grabitësit, në banesa e biznese.
