Një skaf 5 metra i gjatë, që po transportonte drejt brigjeve të Italisë 300 kg marijuanë, u bllokua ditën e djeshme në brigjet e Brindisit.
Gomonia e dyshimtë, që ishte nisur nga brigjet e Qerretit të Kavajës, u konstatua rreth orës 06:10 të mëngjesit të djeshëm dhe u ndoq në det nga mjetet lundruese të Guardia di Finanza s dhe ato të Delta Forcës për rreth 5 orë, derisa u arrit bllokimi i saj.
Pasi mjeti lundrues është vënë nën kontroll, nga ana e forcave të policisë është bërë shoqërimi drejt brigjeve të Brindisit në Itali, ku janë vënë në pranga dy skafistët nga Kavaja, shtetasit me iniciale B.K., 46 vjeç dhe T.V., 36 vjeç.
Burime zyrtare të Policisë së Shtetit thanë se në gomone u gjetën 12 pako të përmasave të ndryshme, të mbushura me bimë narkotike, me një peshë totale prej 300 kilogramësh.
