Olsion Muça, efektivi i ushtrisë, në repartin e Poshnjes në Berat u arrestua sepse pasditen e djeshme qëlloi me armë para filialit të një banke në Lushnje. Përpara oficerëve të policisë ai ka pranuar krimin dhe ka thene se kishte nevojë për para.
I riu ka rrëfyer se kishte aplikuar për një overdraft page, por kërkesa i ishte refuzuar nga banka.
Muça tha se kishte qenë në gjendje të vështirë psikologjike dhe se kishte konsumuar sasi të mëdha alkooli. Në këtë situatë ka shkuar në banesën e tij ku ka marrë një pistoletë të cilën e mbante pa leje dhe një maskë.
25-vjeçari tentoi të hynte në bankë, kur punonjësit po kryenin veprimet dhe klientët ishin larguar, por kur nuk hapi dot derën qëlloi 6 herë me armën e tij. Pas rënies së alarmit u largua, por policia e arrestoi disa orë më pas.
25-vjeçari jeton me qira në lagjen “Xhevdet Nepravishta” të Lushnjës. Gruaja e tij nuk pranon të flasë në lidhje me ngjarjen. Fqinjët thonë e njihnin pak Muçën, pasi jetonte vetëm prej pak kohësh në këtë pallat.
Mësohet se çifti i dy fëmijëve jetonte në kushte të vështira ekonomike, ku edhe bashkëshortja ishte e papunë.
