Këto pamje tregojnë se brenda avionit tip “Piper”, që u ul sot në mëngjes në Ishëm të Durrësit pa leje fluturimi nga aviacioni civil, janë gjetur disa dokumente personale të pilotit Guido Andrea Guidi, manuali i përdorimit të avionit dhe disa shishe me ujë.
Por pavarësisht faktit se në avion nuk u gjet lëndë narkotike, prokuroria është përqendruar në një hetim lidhur me trafikun ndërkombëtar të drogës.
Nga ana e tij piloti 69vjeçar ka mohuar kategorikisht të ketë lidhje me trafik droge.
“U nisa në mëngjes nga Bari dhe do të udhëtoja për në veriun e Italisë. Meqë koha ishte e mirë, atëherë vendosa të bëj një shëtitje mbi hapësirën ajrore shqiptare. Nuk i lajmërova autoritetet ajrore, pasi ishte një fluturim për turizëm. Kur ndodhesha afërsisht 5 mijë këmbë lartësi avioni pësoi defekt dhe po shihja mundësinë të ulesha. Nga lart dallova hapësirën që mu duk e përshtatshme për të bërë uljen. Në momentin që preka tokën, rrota e avionit u këput dhe mjeti u përplas”-tha ai për prokurorët e Krimeve të Rënda.
