Ju prezantojmë me Ivan Balliun, mbrojtësin me origjinë shqiptare lindur në Katalonjë, i cili ëndërron të bëhet pjesë e Kombëtares kuqezi në të ardhmen e afërt.
Ivani ka lindur më 1 janar 1992 në Kaldes de Malaveja, provincë e Katalonjës, nga baba shqiptar dhe nënë spanjolle me mbiemër Kampeni. Në një intervistë për “Transfermarkt.de”, 24-vjeçari thotë se nuk di shumë rreth origjinës së tij. “Nuk di shumë, di vetëm që paraardhësit e mi erdhën në Spanjë. Im atë është përpjekur të gjejë regjistrin e familjes, por unë nuk kam shumë informacion”, thotë futbollisti që aktivizohet me Metzin në Ligën 1 franceze.
Balliu luan si mbrojtës i majtë, por mund të bëjë mirë edhe në krahun tjetër të prapavijës. Ai mund të jetë një alternativë e çmuar për Kombëtaren e Shqipërisë, për të cilën thotë se e ka ëndërr ta përfaqësojë. Madje ai pranon se është në bisedime me FSHF-në që kjo të realizohet sa më shpejt. “Agjenti im është në kontakte me Federatën Shqiptare të Futbollit për të gjetur një zgjidhje. Mendoj se i kam dëshmuar cilësitë në karrierën time dhe dua të bëj të njëjtën gjë edhe me ekipin kombëtar”, deklaron lojtari.
Ai tregon se e ndoqi ndeshjen e 9 tetorit mes Shqipërisë dhe Spanjës dhe e vlerëson ekipin kuqezi. “E pashë ndeshjen kundër Spanjës. Mendoj se Shqipëria ka një ekip të mirë, që luan futboll të rrezikshëm në kundërsulm. Nuk bëra tifo për asnjërën skuadër, pasi thjesht e shijova ndeshjen”, pohon mbrojtësi.
Ivani është rritur as më shumë e as më pak por në “La Masia”, akademia e famshme e Barcelonës. Aty ai qëndroi gjashtë vjet (2005-2011), ndërsa për dy sezonet pasardhëse ishte pjesë e Barcelonës B me të cilën numëron 53 paraqitje.
“Ishte periudhë e bukur, – rrëfen Balliu. – Fillova aty kur isha 12 vjeç dhe luajta deri kur u bëra 21. Luajta rregullisht me skuadrën B, ndërsa isha pjesë e dy grumbullimeve edhe në ekipin e parë nën drejtimin e Pep Guardiolës dhe Tito Vilanovës. Guardiolës i jam mirënjohës pasi më dha mundësi ta tregoja veten. Ai është trajner i shkëlqyer, më merrte gjithnjë mënjanë për të më këshilluar kur bëja diçka jo si duhej”.
Te Barcelona ai u rrit me lojtarë si Mark Bartra, Tiago Alkantara, Serxhi Roberto e Xherard Deulofeu, me të cilët ruan miqësi edhe sot e kësaj dite. “Veçanërisht me Serxhin dhe Deulofeun mbaj kontakte të shpeshta. Këtë verë i kaluam pushimet së bashku në Ibica”, tregon 24-vjeçari.
Në verën e 2013-s futbollisti që ka luajtur tri ndeshje me Spanjën U-16 (ka shënuar një gol) dhe po kaq me atë U-17, vendosi të lërë Katalonjën në kërkim të një aventure të re. Ai iu bashkua Aroukas, ekip i ligës së parë portugeze, ku luajti për dy sezone. Aty Balliu fitoi menjëherë vendin e titullarit dhe luajt rregullisht për dy sezonet që pasuan.
