Gjykata është zhvendosur sot në Spitalin e Traumës aty ku ndodhet i shtruar prej 3 ditësh Gentian Hoxha. Gjyqtarja Shefkie Demiraj tha se i akuzuari foli shumë pak pasi ishte në gjendje të rëndë.
“Masa e sigurimit e kërkuar nga Prokuroria e Rrethi Gjyqësor Tiranë ëshët ajo e arrestit me burg parashikuar nga neni 208 i Kodit të Procedurës Penale. Kishte avokat të caktuar nga shteti sepse nuk kishte avokat të zgjedhur. Foli shumë pak, është rëndë”, tha gjyqtarja në përgjigje të interesit të medias.
Ndërsa avokati i Gentian Hoxhës, tha se për momentin nuk kanë asnjë pretendim. Sipas avokatit, i plagosuri ka thënë se i ka shpërthyer një pako që e ka pasur në dorë.
“Pamë rrethanat. Nuk kemi informacion tani për tani. Do shohim në vijim se si do të veprojmë lidhur me mbrojtjen. Ai thjesht thotë se ka pasur një pako në dorë dhe i ka shpërthyer. Në vijim do shikojmë faktet provat, sepse akoma nuk jemi njohur. Pretendimi fillestar është se i ka shpërthyer një telefon në dorë”, theksoi avokati.
Ngjarja ndodhi më 12 mars, rreth orës 10:40, në rrugën ” Qamil Guranjaku ” në një dyqan celularësh në pronësi të shtetasit Gentian Hoxha, 34 vjeç. Ka qene një shpërthim tejet i fortë që tronditi zonën. Dyqani ndodhet pranë rrugës së Elbasanit, aty ku është e vendosur edhe ambasada amerikane. Nga dyqani u nxorr i plagosur Gentian Hoxha. Në fillim u fol për tritol, por për shkak se jane gjetur disa mjete te dyshimta, si kapsolla e detonatorë, prokuroria ka ngritur akuze ndaj tij per montim te minave me celular.
Ndërkaq, nga burimet policore mësohet se po verifikohen disa persona që mendohet se kanë lidhje me Hoxhën, ndërsa kjo linjë e bombave me celular ofronte materialin kundrejt një çmimi prej 1500 eurosh.
