Një 30-vjeçar është vënë në pranga, pasi grabiti një klinikë private edhe pse ishte me detyrim paraqitjeje.
Shtetasi Indrit Korabi është arrestuar në flagrancë nga policia, pasi ka grabitur një shumë parash në një klinikë private në qytetin e Vlorës, gjatë kohës që ishte me masën “Detyrim paraqitjeje” të caktuar nga Gjykata, për veprën penale “Vjedhja”.
Sipas uniformave blu, 30-vjeçari edhe pse ishte me masën ‘Detyrim paraqitjeje”, vazhdonte të kryente vjedhje në zona të ndryshmë të qytetit të Vlorës.
“Shërbimet e Komisariatit të Policisë Vlorë, në vijim të punës për parandalimin, evidentimin dhe goditjen e veprimtarisë kriminale në fushën e vjedhjes së pronës dhe pasurisë, bazuar dhe në informacionet e siguruara për një shtetas që ishte me masë “Detyrim paraqitjeje” dhe vazhdonte të kryente vjedhje, në zona të ndryshme të qytetit të Vlorës, menjëherë kanë organizuar punën për kapjen e tij. Në vijim të veprimeve u bë arrestimi në flagrancë i shtetasit I. K., 30 vjeç, banues në Vlorë.Ky shtetas dyshohet se ditën e djeshme, ka vjedhur në shumë parash, në një klinikë private, në qytetin e Vlorës”, tha polica.
Materialet i kaluan Prokurorisë, për veprime të mëtejshme procedurale./Opinion.al
