Ish-Presidenti i Kinës Hu Jintao është nxjerrë jashtë nga ceremonia e mbylljes së Kongresit të Partisë Komuniste.
Në video u pa momenti kur 79-vjeçarit iu afruan disa persona të cilët e shoqëruan për ta nxjerrë jashtë. Në atë moment ai ishte ulur pranë Presidentit Xi Jinping. Hu Jintao i tha diçka Presidentit, e më pas u afruan dy zyrtarë të cilët e larguan nga salla.
Pamjet e Hu Jintao-s që i kërkohet të largohet nga skena po tërheqin vëmendjen globale, ndërsa njerëzit përpiqen të kuptojnë atë që ka ndodhur. Ka shumë pyetje dhe asnjë përgjigje deri më tani nga qeveria kineze.
Ish-udhëheqësi i vendit, në një moment, u shfaq ngurrues për të lëvizur. Nëse është kështu, pse? Çfarë i tha ai njeriut që e zëvendësoi, Xi Jinping, gjë që shkaktoi një tundje me kokë nga lideri aktual i Kinës dhe çfarë i tha ai mbrojtësit të tij Li Keqing ndërsa e goditi në shpatull para se të dilte nga skena?
Dy arsyet më të mundshme për largimin e tij janë ose se ishte pjesë e politikës së Kinës me një lider që përfaqësonte një kohë të mëparshme që u largua simbolikisht, ose se Hu Jintao ka probleme serioze shëndetësore.
Pas kongresit njëjavor, partia Komuniste në Kinë konfirmoi zotin Xi, 69 vjeç, për një mandat të tretë historik.
Ngjarja, e mbajtur në Pekin çdo pesë vjet, forcoi pozicionin e tij si udhëheqësi më i fuqishëm i Kinës që nga Mao Ce Duni.
