Ky është momenti kur një i ri shqiptar që po transportonte drogë ka tentuar t’i ikë policisë duke kryer manovra të rrezikshme e duke përplasur një motor të tyre.
Sipas mediave greke, ngjarja ka ndodhur gjatë një ndjekjeje mesditën e së enjtes në qendër të Athinës.
Për më shumë se një kilometër policët grekë kanë ndjekur shqiptarin që nuk u ndal në sinjalin që i dhanë.
Policia nga ana tjetër është kundërpërgjigjur me të shtëna deri sa ka arritur ta vërë në pranga shqiptarin.
Ndjekja ka nisur nga autobusi i KTEL-it të Liosionit, nëpër rrugët e ngushta të zonës së banuar, duke rrezikuar shumë qytetarë kalimtarë. Fillimisht efektivë të skuadrës “DIAS” i kanë bërë shenjë automjetit të ndalonte por drejtuesi ka shtuar shpejtësinë dhe është larguar. Gjatë kësaj tentative, automjeti ka përplasur motorin e skuadrës “DIAS”.
Më pas policët kanë shtënë me armë në drejtim të gomave të mjetit, duke ndalur makinën dhe kanë arrestuar autorin.
Gjatë kontrollit brenda mjetit, janë gjetur dhe sekuestruar rreth 20 kg marijuanë.
Mësohet se I riu është një 26-vjecar shqiptar, i cili është shoqëruar menjëherë drejt komisariatit të Agio Pantaleimona./Opinion.al
