Gazmir Daci, njeriu që i shpëtoi atentatit të mirëorganizuar në burgun e Vaqarrit, rrëfen për traumën që përjetoi pas ngjarjes. Prej asaj dite, ai qëndron në qeli nën masa të rrepta sigurie dhe çdo lëvizje e tij kontrollohet.
Daci shprehet se brenda ambienteve të burgut ndihet i sigurt dhe si besimtar i devotshëm mysliman, ai ka besim se Zoti do ta mbrojë edhe në të ardhmen. I paraburgosuri shprehet se e ka takuar kosovarin që mbeti gabimisht i plagosur dhe ndjen keqardhje për çfarë i ndodhi.
Teksa qëndron në qelitë e burgut të Vaqarrit, Daci duket se vuan edhe pasigurinë për jetën e familjarëve, të cilët sipas tij rrezikojnë të preken nga gjakmarrja. Ndaj, i bën thirrje shtetit t’i marrë në mbrojtje.
Duke iu rikthyer ngjarjes së rëndë të ndodhur një vit më parë, ku pas një sherri la të vrarë Valmir Kolaverin dhe plagosi rëndë vëllain e tij, Daci shpreh pendesë dhe u kërkon falje publike familjarëve të viktimave.
Gazmir Daci ndodhet në qeli prej disa muajsh, si i dyshuari kryesor për krimin e rëndë të ndodhur në nëntor të vitit të kaluar dhe po përballet me akuzat në gjykatën e Tiranë. Në akuzë është vënë edhe babai i tij, Xhelal Daci, pasi dyshohet se fshehu armën e krimit.
