Këngëtarja Çiljeta Xhilaga i është bashkuar fushatës së Partisë Socialiste për zgjedhjet e 25 prillit. Këtë të hënë ajo është shfaqur krah kryebashkiakut, Erion Veliaj, drejtues i qarkut politik të Tiranës.
Gjatë një takimi me të rinjtë e Kavajës, këngëtarja tha se Veliaj është nga ata njerëz që di si t’ia fitojë zemrën rinisë, madje edhe vetë këngëtares.
“Ndoshta shumë habiten që më shohin sot këtu, por unë di të them vetëm dy fjalë, që lali Eri është nga ata djem që di t’i fitojë zemrën rinisë dhe ma ke fituar zemrën dhe mua. Sepse përtej pjesës partiake si politikan, ai mbi të gjitha di të jetë njeri me një zemër shumë të madhe, të paktën mesa e kam njohur unë kohët e fundit nga afër” , tha këngëtarja.
Sakaq këngëtarja ka dhënë edhe një mesazh për të rinjtë: “Unë sot jam këtu si Çiljeta, si artiste, sot tek ju shoh veten time para shumë vitesh, kur kisha plot ëndrra dhe pasione, kështu që ajo këshillë që unë do t’ju jepja ishte që vini zemrën në pasionet tuaja, në ëndrrat tuaja, sepse ajo do të zgjojë çdo gjë, që ju t’i shkoni ëndrrës tuaj deri në fund.”/Opinion.al
