Duke çuar në vend amanetin e tij, 69 vjet pas vdekjes, eshtrat e shkrimtarit, politikanit, diplomatit, albanologut Mid’hat Frashëri do të prehen në tokën shqiptare. Arkëmorti i figurës më të keqkuptuar të historisë mbërriti mëngjesin e sotëm në aeroportin e Rinasit.
Mid’hat Frashëri drejtoi Kongresin e Manastirit si dhe ideoi e drejtoi Partinë e Ballit Kombëtar. Djali i Abdyl Frashërit dhe nipi i Sami dhe Naim Frashërit, tashmë prehet në parkun e Liqenit Artificial, Tiranë.
Aurel Plasari dhe Edi Rama renditën në fjalimet e tyre gjithë krijimtarinë dhe pasurinë artistike, politike e intelektuale që i la Mid’hat Frashëri i njohur ndryshe dhe si Lumo Skëndo, këtij vendi. Ndërsa u ndalën dhe tek debati që ka ndezur rivarrimi i tij në Shqipëri.
Ish-Kryeministri gjatë homazheve tha: “Ai sot vjen e pushon nën qiellin dhe në tokën e atdheut të tij, i nderuar nga mbarë shqiptarët, kurse ata që urdhëruan eliminimin e tij fizik, kanë përfunduar në koshin e plehrave të historisë. Eshte fjala direkt për Enver Hoxhën. Nderim të madh këtij burri të shquar të kombit tonë”.
Ndërsa, kryedemokrati Basha, tha: “Është një nga ditët e rralla që qëndrojmë përpara një aktmorti me një sens krenarie. Kënaqësi që eshtrat e këtij burri të madh, patrioti të rrallë që ka bërë kaq shumë për Shqipërinë, do të prehen sipas amanetit të tij. Dua të falenderoj të gjitha ata që e bënë këtë të mundur”.
Kërkesa për kthimin eshtrave të Mid’hat Frashërit në Shqipëri erdhi një vit më parë nga fondacioni Lumo Skëndo dhe profesor Uran Butka.
