Është përcjellë për në banesën e fundit Agur Vrenozit, i cili humbi jetën pasi u qëllua me plumb në kokë nga grabitësit në qytetin e Fierit.
Trupi i 54-vjecarit është tranportuar nga Spitali i Traumës në Tiranë për në qytetin e Fierit rreth orës 13:00, ndërsa në orën 15:00 u bë edhe varrimi në varrezat e Radostinës.
I pranishëm përveç miqve dhe të afërmve ishte edhe ministri i Turizmit dhe Mjedisit Blendi Klosi.
Në një pronomcim për mediat Klosi tha se Vrenozi humbi jetën duke kryer një akt heroik dhe ka qenë shembull i një njeriu të përgjegjëshëm.
“Në të tilla raste fjalët janë të tepërta, erdhëm së bashku me deputetët për të shprehur ngushëllimet tona me të sinqerta. Natyrisht shprehim të gjithë indinjatën tonë për këtë ngjarje, dhe nga zemërimi i kësaj indinjate vlerësimi maksimal për veprën e inspektorit, veprën e babait të mrekullueshëm, veprën e një shtetari të rregullt. Babai i tre fëmijëve i cili humbi jetën duke kryer një akt heroik dhe duke qenë shembull i një njeriu të përgjegjshëm,” tha Klosi.
