Minella dhe Elsa Muça janë një çift në moshë. Ata ranë pre e një tentative grabitje në orët e para të ditës sotme që përfundoi tragikisht. Një person u vra gjatë përplasjes me policinë dhe një tjetër u plagos. Kamerat kanë kapur pak momente, kur znj. Elsa ka dalë për të pastruar derën e banesës së saj në katin e tretë të një pallati në lagjen “29 nëntori” të Fierit.
Është pikërisht dera që tentuan të hapnin grabitësit për t’ju vjedhur banesën. Edhe pse ka qenë ora 03:00, ata kanë dëgjuar zhurmë në derë dhe kanë njoftuar policinë që ka mbërritur menjëherë. Grabitësit janë zbrapsur, por gjatë largimit, përpara pallatit, kanë hapur zjarr ndaj policisë e cila po ashtu u përgjigj me zjarr duke vrarë njërin prej 4 personave të armatosur dhe me maska.
Elsa Muça e përshkruan kështu ngjarjen: “Dëgjuam zhurma dhe u frikësuam, ndaj njoftuam policinë. Ata tentuan të hapnin derën, po lëviznin llozin. Shyqyr që e kisha vendosur llozin, se e lija hapur. Madje Minella më thoshte shpesh herë pse se mbyll”, tregon gruaja. Sakaq i shoqi, Minella, sapo sheh gazetarët mbyll derën duke thënë “na falni se kemi punë…” /Opinion.al
