Ka mbërritur në aeroportin Nënë Tereza, avioni i parë me 121 qytetarë afganë, mes të cilëve gra dhe fëmijë.
Ata janë pritur nga Ministrja për Evropën dhe Punët e Jashtme Olta Xhaçka, ambasadorja e SHBA, Yuri Kim, drejtues të FA dhe Policisë së Shtetit.
Pasi kanë zbritur në tokën shqiptare ata i janë nënshtruar përpunimit të të dhënave individuale, regjistrimit dhe më pas ekzaminimeve mjekësore në çadrat e ngritura në Rinas. Më pas me autobus të dedikuar i janë drejtuar hotelerive në Durrës, ku do të strehohen dhe qëndrojnë për aq sa është e nevojshme.
Prej më shumë se dy javë në vendin tonë pritjej që të vinin refugjatët afganë, pasi talebanët morën pushtetin në Afganistan.
Kryeministri Edi Rama bëri me dije disa ditë më parë vendimin e qeverisë shqiptare për të pritur në vendin tonë afganët, pas kërkesës së SHBA. Ndërkohë ai ka deklaruar se Shqipëria do të strehojë përkohësisht rreth 4 mijë refugjatë./Opinion.al
