Një tjetër rast i transportit të emigrantëve të paligjshëm është goditur nga policia, këtë herë në qytetin e Fierit.
Autoritetet bëjnë me dije se në Poçem u ndalua për kontroll një furgon i drejtuar nga 47-vjeçari me iniciale E.I. nga Berati. Brenda furgonit ishin fshehur 11 emigrantë të paligjshëm nga vendet e Lindjes së Mesme.
“Në zbatim të planit të masave për të parandaluar dhe goditur aktivitetin e paligjshëm të dhënies ndihmë shtetasve të huaj për kalim të paligjshëm të kufijve dhe tranzitimin e tyre në territorin shqiptar, me destinacion vendet e BE-së, nga specialistët për Hetimin e Trafiqeve të Paligjshme në DVP Fier në bashkëpunim me shërbimet e Komisariatit të Policisë Mallakastër, pas informacioneve të marra në rrugë policore se një automjet furgon tip “Benz” po transportonte klandestinë drejt Tiranës, finalizuan operacionin policor të koduar “Poçemi”, në përfundim të të cilit u arrestua në flagrancë shtetasi E. I., 47 vjeç, banues në Berat”, njofton policia.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale, për veprën penale “Ndihma për kalim të paligjshëm të kufijve”./Opinion.al
