Elseid Hysaj, futbollisti shqiptar i Napolit, ka qenë këto ditë në vendlindje, ku ka bërë edhe “përgimin” e djalit. Ai kishte marrë një ditë pushim nga klubi i Napolit dhe, siç e do tradita e zakoni, është mbledhur me familjarët, të afërmit e miqtë e tij, për të zhvilluar një ceremoni festive me rastin e ardhjes në jetë të djalit, Elis. Ka spikatur mes të tjerëve mbrojtësi ynë i kombëtares, bashkë me djalin dhe nusen.
Pasi zhvilluan ceremoninë e “përgimit” në një lokal, Elseid Hysaj nuk e ka privuar veten nga plazhi i Velipojës. Edhe pse kohën në dispozicion e ka pasur të limituar, ai ka provuar detin dhe rërën e këtij plazhi, ndërkohë që është “mbytur” nga pushuesit. Të gjithë kanë kërkuar të bënin foto me të. Ai është larë në det për disa minuta, ka bërë xhiro edhe me motorr uji, ndërsa ka shijuar atmosferën e bregdetit të Velipojës bashkë me familjen.
“Telesport.al” ishte i pranishëm në ceremoninë e organizuar për djalin, edhe kur Hysaj u la në det dhe bëri foto me fansat e vet, duke sjellë edhe këto foto, që dëshmojnë të vërtetën e ardhjes së tij në Shqipëri, jo sikurse kanë shkruar disa portale të tjera shqiptare. Nga Velipoja, Fatlum Kurtaj
